Greqi: anullohen festimet e Krishtlindjeve, maska me detyrim

Masat do të hyjnë në fuqi të premten ndërsa Greqia përgatitet të rrisë numrin e personave të infektuar me variantin omikron të virusit korona.

Koncertet e Krishtlindjeve dhe evente të tjera janë anuluar në Greqi për shkak të masave të reja epidemiologjike të shpallura të enjten, të cilat përfshijnë mbajtjen e detyrueshme të maskave në ambiente të hapura dhe në të gjitha mjediset publike.

Ata që vijnë në Greqi do të bëjnë teste shtesë për COVID-19, ditën e dytë dhe të katërt pas mbërritjes.

Masat do të hyjnë në fuqi të premten ndërsa vendi përgatitet të ketë rritje në numrin e personave të infektuar me variantin Omicron.

Tashmë, 90 për qind e kapacitetit spitalor të reanimacionit është mbushur.

“Për shkak të numrit të madh të aktiviteteve dhe turmave të Krishtlindjeve, përdorimi i detyrueshëm i maskave është plotësisht i justifikuar”, tha ministri i Shëndetësisë Thanos Plevris.

Sipas tij, masat e reja do të jenë në fuqi të paktën deri më 3 janar të vitit të ardhshëm.

Greqia pati një rritje të mprehtë të vdekjeve të lidhura me koronavirusin në nëntor dhe dhjetor.

Megjithatë, ditët e fundit ka pasur një rënie të lehtë. /sarandacity.al/