Greqia, me energjinë elektrike më të shtrenjtë në Europë

Greqia vazhdon të ketë për javën e dytë radhazi çmimin më të lartë të energjisë elektrike në BE.

Të mërkurën, çmimi i shitjes me shumicë ishte mbi 218 euro për MWh, një shifër kjo shumë më e lartë se çdo vend tjetër në BE.

Për krahasim, Bullgaria dhe Rumania kanë çmimin e dytë më të shtrenjtë të shitjes me shumicë së energjisë elektrike, i cili arrin në 188 euro për MWh. Më pas vijnë Hungaria dhe Italia, me përkatësisht 184 euro për MWh dhe 172 euro për MWh.

Sipas të dhënave të ofruara nga EU Energy, disa vende të BE-së janë nën barrierën psikologjike prej 100 euro për MWh, me Gjermaninë dhe Danimarkën që aktualisht kanë shifrën 59 euro për MWh.

Në nivel mujor (dhjetor 2022), Greqia ishte tregu i gjashtë më i shtrenjtë në Europë, me një normë mesatare prej 276,9 euro për MWh, pas Belgjikës, Irlandës, Francës, Zvicrës dhe Italisë. Krahasuar me vitin e kaluar, Greqia është tregu i tretë më i shtrenjtë në Europë, me një normë prej 279,89 euro për MWh, duke u renditur pas Zvicrës dhe Italisë.

Çmimet relativisht të ulëta në Europë pasqyrojnë kërkesën e reduktuar ndjeshëm për energji elektrike, si rrjedhojë e kushteve të buta të motit dhe rënies së çmimeve të gazit natyror në tregun spot.

Greqia thotë se çmimet e energjisë elektrike reflektojnë veçoritë e tregut

Qeveria greke thotë se çmimi i lartë i energjisë elektrike vjen për shkak të veçorive të tregut grek për shitjen me shumicë të energjisë elektrike. Në Greqi, modeli i përcaktimit të çmimit të gazit natyror merr në konsideratë normën mesatare të muajit të kaluar përkundrejt çmimit ditor të vendosur në bursë.

Qeveria greke pretendon se kjo vonesë nuk lejon reflektimin e menjëhershëm të rënies së çmimit të gazit natyror te çmimi i energjisë elektrike me shumicë, siç ndodh në pjesën tjetër të tregjeve.

Megjithatë, siç theksojnë analistët, një nga arsyet kryesore për çmimet e larta është miksi aktual i karburanteve që përdoren për prodhimin e energjisë, ku gazi natyror ka një pozitë dominuese pasi përbën më tepër se 40% të miksit total. Përqindja e linjitit është e ulët, ndërsa burimet e rinovueshme mund të jenë faktor në përcaktimin e çmimeve vetëm për disa orë.

Gjithashtu, konkurrenca e kufizuar në sektorin e prodhimit të energjisë dhe ndërlidhjet e kufizuara janë disa faktorë të tjerë kryesorë që po sjellin rritjen e çmimeve. /monitor/