Ka mbërritur në Shqipëri trupi i Adem Rusit, të burgosurit shqiptar të burgur Malandria në Greqi, i cili, sipas autoriteteve greke, u vetëvar me lidhëse këpucësh në autoburg, teksa po kthehej në qeli pas një vizite në spital.
Por sipas të vëllait, Shkëlqim Rusi, nuk ka patur asnjë arsye se përse Ademi ta ndërmerrte atë veprim, pasi ai dhe tre muaj lirohej, e nga ana tjetër nuk shfaqte asnjë shqetësim, ishte krejt normal.
Edhe sot, ky i fundit kërkon që të zbardhet e vërteta, pasi nuk beson versionin e autoriteteve greke.
“Në Prokurori ka vajtur kallëzimi penal që bëra, dhe do shkoj të pyes për të marrë fletën nëse do pranojnë kallëzimin. Dua me çdo kusht që t’i bëhet autopsia, që të di shkakun e vdekjes e të fle rehat. I kam marrë të gjitha letrat, vetëm atë të prokurorisë pres. Përgjigje deri më tani kam ato që kanë nxjerrë grekët, por unë s’besoj asnjë gjë, këtu do dalë e vërteta.
Morën fillimisht nënën, pastaj më morën mua e më thanë që e kemi çuar në spital, për kontroll rutinë. Natën nuk ka kontroll rutinë.
Ka pirë klorinë më tha drejtori i burgut, tha u bë mirë, kur po e kthenim fatkeqësisht vari veten, në makinë të policisë, me gardianë brenda. Ata nuk të lenë as me lidhëse këpucësh, as me rrip, asgjë të ketë i burgosuri, plus ka qenë i prangosur dhe me 2-3 shoqërues.
Do kërkoj drejtësi deri në fund, sikur edhe kjo të jetë e vërtetë që të ketë varur veten, është neglizhencë e tyre. Pas vëllait tim mund ta kenë radhën të tjerët, shteti tonë duhet të ngrejë strukturë në ambasadat tona që të mbrojë të gjithë të burgosurit. Shpresën vetëm te autopsia e kam”, tha Shkëlqim Rusi. /sarandacity.al/
