Një djerrinë në të djathtë të gjimnazit “Hasan Tahsin”, o do kthehet siç ka qenë, pra fushë sportive, ose ndoshta do shndërrohet në fermë. Kjo, nëse aty do bëhet realitet një ide e shpalosur nga kryeministri Rama, e cila ka të bëjë me një strategji të re kombëtare në arsim.
Në një konsultim publik me nxënës të tre gjimnazeve në Tiranë, ku ai foli mbi aspektin e dobët ekstrakurrikular në arsimin shqiptar, Rama foli dhe mbi fermat në shkolla.
“Në fakt, sot jemi duke punuar për një projekt shumë të thjeshtë, të kthimit të shumë hapësirave të shkollave, që janë hapësira të gjelbra teorikisht, por që përgjithësisht janë hapësira të pashfrytëzuara, në hapësira prodhuese, në mikroferma ku nxënësit e interesuar, nën kujdesin e një agronomi mund të marrin dije për ciklet e prodhimit.
Njëkohësisht, aty mund të krijohen edhe zinxhirë modestë, por sidoqoftë, të rëndësishëm vlerash, sesi prodhimet e shkollës mund të përdoren apo mund të shiten.
Natyrisht nuk bëhet fjalë për prodhime që do ndryshojnë buxhetin e shkollës, por, sidoqoftë, për të hyrë edhe në atë rrugë që folëm, të marrjes parasysh të shumëçka, përpara sesa të vendosësh se kush është drejtimi më atraktiv për karrierën tënde”, ishte ajo çfarë tha e ç’argumentoi i pari i qeverisë. /sarandacity.al/
