Marrin apo jo lekë policët rrugorë? Ç’ndodhi me ndëshkimet në fundjavë

Në deklaratën më të fundit të Policisë mbi ndëshkimet për shkelje të llojeve të ndryshme të atyre që janë në timon, vihet theksi te ata që kanë besuar se mund t’ja hedhin duke i dhënë lek policit.

“Përgjatë fundjavës ka goditur 4 raste të “Korrupsionit aktiv ndaj personave që ushtrojnë funksione publike”, konkretisht: 2 raste janë goditur nga Policia Rrugore e Tiranës dhe 2 nga Njësia për Sigurinë e Autostradës Milot-Morinë.

Shtetasi H. Sh., 30 vjeç, duke drejtuar tip “Porche”, në rrugën “Ded Gjo Luli”, iu ka ofruar para punonjësve të Policisë Rrugore, për shmangien e bërjes së testit të alkoolit; 

Shtetasi Z. F., 54 vjeç, duke drejtuar mjetin tip “Benz”, në rrugën “Jordan Misja”, iu ka ofruar para punonjësve të Policisë Rrugore, për të shmangur masën administrative, pasi nuk kishte vendosur rripin e sigurimit;

P., 39 vjeç, banues në Mitroc, Kosovë, i cili është konstatuar nga shërbimet e Policisë të Njësinë së Autostradës Milot-Morinë, duke kryer manovra të gabuara me një mjet kamion tip “Scania”, në rrugën Milot-Morinë, iu ka ofruar para shërbimeve të Policisë, për të shmangur masën administrative;

Në segmentin rrugor Skurraj – Milot është konstatuar drejtuesi i një mjeti autobus, i cili po qarkullonte pa rrip sigurimi. Pas ndalimit, drejtuesi i autobusit, shtetasi R. S. iu ka ofruar para shërbimeve të Policisë Rrugore, për të shmangur masën administrative”.

Sipas ligjit, këta persona shoqërohen në polici për të vijuar më tej procedimin penal.

Çështja është se, paçka dhe ndëshkimit për këtë gjë, dominon bindja se mjaft t’i japësh policit ndonjë lek dhe gjithçka rregullohet.

Ndaj çështja është ta nuhasësh se ç’lloj polici të bie për pjesë në këtë rast: të atillë që pranojnë paktin apo të atillë që thonë “Zbrit, me ne në Polici!”.

Por dhe kjo është tejet e gabuar. Mjafton të jesh në rregull në ngarjen e makinës dhe s’je më pas i detyruar të vuash nga Policia, edhe prej dilemave. /sarandacity.al/