Media greke: Ja si provokon media shqiptare në Epirin e Veriut

“Nuk është e pazakontë që mediat dhe gazetarët shqiptarë të përpiqen të prishin paqen e Pakicës Etnike Greke në pjesën jugore të vendit, me raporte provokuese që synojnë të nxisin nacionalizmin shqiptar për disa minuta vëmendje”, shkruan Protothema, referuar një raportimi gazetaresk në emisionin “Ora Verore”.

Ajo vijon më tej të përshkruajë atë çfarë ndodh me gazetarin, duke e vendosur Derviçanin jo në Shqipëri por në Epirin e Veriut.

“Stafi i televizorit ishte në fshatin minoritar Derviçan në Epirin e Veriut, me gazetarin që ‘pyeste veten’ në publik dhe kërkonte shpjegime, ‘pse në një fshat në Shqipëri ata flasin greqisht ose kanë shenja rrugore greke?’.

Me shumë ironi, gazetari pyet një grek ‘pse flet greqisht?’, vetëm për të marrë përgjigjen se ata gjithmonë kanë folur greqisht në shtëpinë e tij dhe gjuha greke mësohet edhe në shkollën e tyre. Duke vazhduar në të njëjtën mënyrë, gazetari pyet një banor tjetër të Derviçanit nëse flitet greqisht në fshat për shkak të… pensionit që marrin nga Greqia. Përgjigja se ‘greqishtja është gjuha amtare e rajonit dhe se rajoni njihet nga Shqipëria si pakicë’ nuk duket se e dekurajon gazetarin shqiptar, i cili vazhdon raportin, edhe pse shumë refuzojnë të dalin në televizion, një fakt që gazetari duket se nuk respekton.

Kjo nuk është hera e parë që një stacion televiziv në Shqipëri përpiqet të paraqesë si ‘lajm’ faktin që greqishtja flitet në fshatrat minoritarë grekë të Epirit të Veriut. Një vit më parë, një gazetar tjetër po provokonte dhe tallej me banorët e moshuar, përsëri në fshatin Derviçan, sepse flisnin greqisht.

Duke komentuar incidentin në protothema.gr një përfaqësues i pakicës greke në Shqipëri, theksoi se: ‘Edhe pse jemi në vitin 2021, shumë nuk duan të pranojnë ekzistencën e grekëve autoktonë në vend’”. /sarandacity.al/