Manastiri i njohur i Shën Nikollit në Mesopotam kish një këmbanë me një tingull shumë të fortë e të ëmbël.
Thonë që kur binte ajo dëgjohej në terë pellgun e Vurgut deri në Butrint. Ishte trekëndëshi Mesopotam-Butrint-Monastiri i Druganos afër Koqinolitharit.
Në ato kohë të vjetra, sa binte këmbana e Shen-Nikollit të Mesopotamit përgjigjeshin edhe ato.
“Po ç’u bë këmbana?”, do të pyesni ju. Këmbana është “transferuar” në kishën tjetër të Mesopotamit. Ajo këmbanë që kishte shekuj në këmbanoren madhështore të Monastirit, papritur ndërroi vend pa dëshirën e saj. Cila është kjo histori e çuditshme?
Në vitin 1997, syrit të “hienave të natës” nuk i shpëtoi as Manastiri i Mesopotamit. U vodhën ikona me vlera, bile bënë edhe gërmime natën, brenda Tempullit të Shenjtë, pasi futesh në derë, në kërkim të florinjve apo gjërave me vlerë, pasi thoshnin se aty ishte rivarrosur koka e Piros pas shkatërrimit të Finiqit. Etja e këtyre “çakejve” nuk kish ngopje. Ata i vunë syrit edhe këmbanës në këmbanoren që ish në një lartësi të frikshme.
Një natë të errët, ata iu ngjitën si hiena këmbanorës. E zbritën dhe e morën për të marrë atë pak flori që kish ajo. Ditën tjetër, kujdestari i manastirit, monumentit të rrallë të kulturës në jug të Shqipërisë, P. Sh., e gjeti bosh këmbanoren. Për disa kohë manastiri ngeli pa këmbanë. U interesua konsulli grek në Gjirokastër, Bornova, dhe u sigurua nga Selaniku një këmbanë qe e zëvendësoi. Po nuk kishte atë hije qe kish këmbana shekullore. Do të rridhnin javët, muajt, viti..,
Një mëngjes, kujdestari kur po vinte çelësin e madh te brava e derës hapi sytë i habitur. Para derës këmbana, një shishe vaji ulliri 1,5 litra dhe një pesëmijëshe. P.Sh. ktheu kokën nga Manastiri i Kostarit i Shë-Mërisë dhe bëri kryqin. “E bëre thagmën Shën Mëri!”
Vetëm Shën Mëria mund ta di pse ndërruan mendje ‘hienat’ dhe e rikthyen këmbanën. Këmbana e vjetër, meqë e kish zenë vendin shoqja e saj, nuk u mërzit. U vendos te kisha përballë, te Qendra Shpirterore që ndertoi Kryepeshkopi, te shkolla “Frymë dashurie”. Të dyja përshëndesin njëra-tjetrën…
Panajot Boli – /sarandacity.al/
