Policia e Sarandës ka hasur në një lokal, i cili, sipas njoftimit zyrtar, pos që nuk ishte regjistruar, shërbente jashtë orarit, me muzikë të lartë, mbante madje dhe kanabis.
Ka ndodhur kjo te Ura e Kranesë, ku të proceduar janë dhe klientët e atyshëm.
“Shërbimet e Komisariatit të Policisë Sarandë vijojnë kontrollet për zbatimin e planit të masave për garantimin e rendit dhe qetësisë publike dhe monitorimin e lokaleve që vijojnë organizimet me muzikë pas orarit të përcaktuar për mbyllje, në kundërshtim me masat anticovid të vendosura nga organet kompetente.
Në vijim të kontrolleve, shërbimet e Policisë kanë konstatuar në vendin e quajtur ‘Ura e Kranesë’ 1 subjekt që po vijonte organizimin e aktivitetit me muzikë pas orarit të përcaktuar për mbyllje.
Në vijim të veprimeve specialistët e Hetimit të Krimeve në Komisariatin e Policisë Sarandë proceduan penalisht administratorin e subjektit shtetasin V(D). M., 45 vjeç, për veprat penale ‘Prishja e rendit dhe qetësisë publike’ ‘Ushtrimi pa lishencë i veprimtarive financiare’, dhe ‘Prodhim dhe shitje lëndësh narkotike’.
Gjithashtu, është vendosur masa administrative 1.000.000 lekë, për administratorin e subjektit, për shkelje të orarit të përcaktuar në aktin normativ, dhe masa administrative 10.000, për 23 klientë, të konstatuar në subjekt”, thuhet në deklaratë. /sarandacity.al/
