Opozita e ka artikuluar një emër të saj për president. Është Dashamir Shehi. Në kohën kur ende nuk përmendet ndonjë emër kandidat, pra as nga mazhoranca, nga radhët e pakicës ky është njeriu që sipas tyre ia vlen që të pasojë Metën në krye të shtetit.
Ideja ka ardhur në fakt jo nga PD, një prej dy gjysmave të saj, por nga individë që mendojnë se janë faktorë në politikë, falë mediave që iu referohet rregullisht pa seleksionim. Ata janë Fatmir Mediu dhe Agron Duka, krerësh partish “pa parti”, pra pa ndonjë forcë në elektorat.
“Racionalja do kërkonte një kandidat të përbashkët. Ne si opozitë duhet të jemi të afruar për të krijuar mes veten marrëdhënie konsensuale pastaj ta ndërtojmë me palën tjetër.
Ne kemi filluar të diskutojmë edhe për emrat. Unë kam diskutuar e me Agron Dukën dhe kemi propozuar emrin e mikut tonë Dashamir Shehi. Ka një histori politike por thamë edhe një herë që duhet konsensus i përbashkët”, tha Mediu në Top Talk.
Po cili është Dashamir Shehi në një këndvështrim të caktuar?
Ai, prej vitesh është ndër njerëzit më prezentë në media, falë këmbënguljes për t’u marrë me politikë ose analiza politike, por kurrë me ndonjë peshë politike të caktuar, edhe pse ka dhe ai një parti, gjithsesi pa elektorat.
I dalluar për një artikulim të veçantë politik, të tipit popullor, te figura e tij shihet dhe tironsi tipik i traditës, ai i muhabetit me ndonjë gotë e ca pak meze përpara.
Kohë më parë, do ironizohej keq nga Rama, në stilin e njohur të këtij të fundit, si “ngrënës paçeje me orientim europian”, pasi tha në parlament se Shqipëria nuk duhej t’i drejtohej Turqisë për investime në ekonomi, por sipas tij vetëm Europës. E përkthyer ndryshe, si kritikë ndaj Ramës për aleancën e fortë me Erdoganin.
Gjithashtu, Shehi nuk ka mbuluar kurrë poste të rëndësishme shtetërore me tregues të qartë aftësie apo kreativiteti, si provë e të qënit një shtetar i denjë.
Ai ka qenë ministër i PD-së për pak vite në qeverinë “Meksi”, duke drejtuar Punën dhe Çështjet Sociale, e më pas ka një thatësirë që vijon dhe sot në aspekt të përgjegjësive të caktuara shtetërore. Edhe në vitet e qeverisjes së PD-së me Berishën kryeministër, atij s’ju dha asnjë post shtetëror, qoftë dhe në nivele të dyta apo të treta.
Vështirë të thuhet se është i denjë për kreun e shtetit jo thjesht për këtë fakt, pra nga karriera e varfër prej shtetari, por dhe nga imazhi i një njeriu qejfli pijeje, gjë të cilën ai dhe e ka pranuar publikisht. /sarandacity.al/
