Kryetari i Bashkisë Adrian Gurma vëzhgoi nga afër punën që bëhet për funksionimin e Qendrës së Grumbullimit të mbetjeve të riciklueshme në Volloder, e cila është vënë në punë javët e fundit.
“Inspektova sot nga afër punën që bëhet për funksionimin e Qendrës së mbetjeve të riciklueshme në Volloder dhe përdorimin e koshave prej rrjete, vendosur përgjatë shëtitores së re, të dyja financim i qeverisë gjermane përmes projektit të GIZ Albania në Bashkinë Sarandë, për krijimin e kapaciteteve grumbulluese të diferencuara të mbetjeve të riciklueshme si plastikë, alumin, letër e karton”, u shpreh kryebashkiaku Gurma pas vizitës aty.
Artur Galanxhi, Koordinatori i projektit të modernizimit dhe menaxhimit të integruar të mbetjeve urbane dhe riciklimit, gjatë prezantimit që i bëri këtij projekti në Bashkinë Sarandë u shpreh:
“Ky projekt që do të fillojë të funksionojë në rreth 100 biznese, shkolla, gjimnaze si fillim e më pas do të shtrihet në gjithë qytetin.
Në këtë pikë në Volloder do të bëhet mbledhja, seleksionimi, presimi e paketimi i materialeve të riciklueshme, të cilat më pas do të dërgohen në pikat në të cilat do të bëhet riciklimi i tyre”.
Gjithashtu në qendër dhe në shëtitoren e qytetit, janë vendosur disa kosha në të cilat kalimtarët mund të hedhin vetëm bidona plastikë e kanaçe alumini. /sarandacity.al/
