Një përsiatje anti-korrupsion nga qeveria

Ministri i Drejtësisë Ulsi Manja ofroi një recetë se si mund të luftohet korrupsioni, duke ia përcjellë si “kompetencë” çdo njeriu.

Sipas tij, ai që më pas bëhet “peshk i madh”, në fillim është “cironkë”.

Duke marrë shkas nga Dita Ndërkombëtare Anti-Korrupsion, ai shkroi:

“Bindja ime është e palëkundur: ata që i lidh me njëri-tjetrin korrupsioni, nuk janë atdhetarë. Mund të bërtasin sa të duan në FB, apo në stadium, të bëjnë shqiponjën, a të grinden për nacionalizma, janë hipokritë që i bëjnë dëm vendit.

Lufta ndaj korrupsionit nuk ka përjashtime, nuk ka solidaritet miqësor, fisnor a partiak, ndryshe je bashkëpunëtor.

Secili prej nesh ka betejën e tij, në këtë luftë të madhe për të frenuar këtë virus dhe vaksina e vetme është dashuria për vendin duke denoncuar çdo formë abuzimi.

Indiferenca ndaj korrupsionit është bashkëpunëtorja më e madhe e tij. Është mbulesa ku rrinë ngrohtë ata që gërryejnë rrënjët e vendit, edhe ‘të tuat; miku im që po lexon, sepse pavarësisht sa i ndershëm je, në pasaportën tënde që lexon ‘shqiptar’ ke si damkë leximi ‘i korruptuar’, pikërisht për shkak të raporteve që vijnë edhe indiferenca shumëvjeçare.

Korrupsioni nuk është i madh, apo i vogël, nuk matet me peshë a me shifra. Është i njëjtë dhe dëmin e bën po njësoj, vetëm se do pak kohë që ai peshku i vogël të rritet e të bëhet i madh.

Ndaj duhet frenuar që kur është cironkë”, shkruan i pari i Drejtësisë në Shqipëri.

Manja thotë se në këtë betejë, Shqipëria dhe aleatë të fortë.

“Le të bëhemi bashkë, në këtë luftë; kemi një nga mbështetjet më të fuqishme SHBA-të, kemi gazetarë të përgatitur dhe të aftë, kemi të rinj që duan me zemër të shnjollosin emrin e Shqipërisë, prandaj pak guxim qytetar për të mos lejuar askënd të abuzojë, apo më mirë të guxojë të abuzojë. Kështu i shërbejmë vendit. Kështu i shërbejmë demokracisë. Kështu i shërbejmë të ardhmes”. /sarandacity.al/