Një zë nga mazhoranca, ndër më opozitarët brenda saj, Erion Braçe, pretendon se qeveria mund ta frenojë ngritjen e çmendurak të çmimit të naftës, tej faktorit diktues “Ukrainë”. Rama nga ana e tij, “ngre duart” për këtë.
“Unë mendoj se po, ka mekanizma qeveria për uljen e çmimit të naftës”, tha Braçe.
“Unë jam kundër protestës, politika fiskale nuk bëhet në rrugë”, shtoi ai nga tjetër, duke vijuar në përpjekjen për të qenë parimor në atë që thotë.
“Përgjegjësinë sociale për shtresat në nevojë, për bujqit, për shtresën e mesme, duhet ta mbaj shteti, jo tregtarët”, tha Braçe, gjithsesi duke refuzuar atë që ndodhi dhe para Kryeministrisë.
“Nuk do t’i bashkohem protestës së qytetarëve. Ka aty njerëz që kanë dhënë kontribut domethënës në grabitjen e burimeve të gazit dhe naftës. Ka hajdutë banalë aty dhe ju(gazetarët) mund t’i pyesni sepse tani bëjnë si civilistë”.
Për Braçen, çmimi i naftës mund të kontrollohet nga Autoriteti i Konkurencës, por që sipas tij “rri e bën sehir”.
“Me autoritetin e Konkurencës unë kam ndërprerë çdo lloj marrëdhënie. Përgjegjësia është e tyre!
Të rritet çmimi nga darka në mëngjes me 40 lekë dhe autoriteti i Konkurencës të rri të bëj sehir, kjo është e papranueshme”, tha deputeti socialist, ndër më aktivët në politikë, ku nuk kursen as qeverisjen e tij në kritika.
Për të, është momenti të mendohet dhe për bukën, pra grurin, kultivimin e tij në vend, si dikur.
“Jemi në mes të një krize që do jetë edhe krizë ushqimore, që na nevojitet bujqësia kombëtare dhe prodhimi kombëtar tani”, tha Braçe. /tesheshi.com/
