“Ujku” që tentoi t’i vinte zjarrin lokalit të njohur në Sarandë: si u arrestua me shishe benzine në dorë

Lokali i njohur i Spiro Iljadhit, i qëlluar me pasojë plagosjen nga tre persona nga Tepelena, është tentuar të digjet mbrëmë rreth mesnatës.

Personi që e ka tentuar këtë vepër, duke tentuar ta realizojë djegien me benzinë, quhet Luan Obzova, person me precedentë penalë në fushën e narkotikëve. Ndryshe quhet dhe “Ujku”.

Për lëtë rast, nga Policia e Sarandës raportohet zyrtarisht si vijon: “Në vijim të kontrollit të imtësishëm të territorit, patrullimit në të gjitha lagjet e qytetit dhe rrugicat pa ndriçim, në lagjen Nr. 1, nga patrulla e Qarkullimit Rrugor është konstatuar një shtetas i cili po kryente lëvizje të dyshimta me një motomjet dhe më pas ka ndaluar pranë një lokali në këtë lagje dhe ka tentuar ta djegë me një shishe me lëndë djegëse. Në momentin që ky shtetas ka vënë re patrullën ka tentuar të largohet, por është kapur dhe prangosur nga  shërbimet e Policisë. 

 Në vijim të veprimeve, nga specialistët për Hetimin e Krimit në Komisariatin e Policisë Sarandë u bë arrestimi në flagrancë, për veprën penale ‘Shkatërrimi i pronës me zjarr’ mbetur në tentativë, i shtetasit L. O., 32 vjeç, banues në Sarandë, i dënuar më parë për veprën penale ‘Prodhimi dhe shitja e narkotikëve’.

Materialet iu referuan Prokurorisë pranë Gjykatës së Shkallës së Parë Sarandë, për veprime të mëtejshme hetimore”.

Dyshohet se Obzova mund të ketë qenë dhe i paguar për ta bërë këtë vepër zjarvënieje.

Nga ana tjetër, nuk dihet nëse akti i tij në tentativë ka lidhje me atë të orëve të mëparshme, ku tre persona qëlluan në drejtimin të pronarit të “Orange”. /sarandacity.al/