Nuk e njihni kush është ky burrë që kalëron dhe është nisur për atje ku e patën thirrur, për të hequr dhimbje e për të dhënë shëndet?
Eshtë mjeku i shumënjohur popullor Koçi Milori. Mrekullibërësi i dekadave të shkuara për qindra njerëz të pamundur, vënësi në vend i eshtrave njerëzore të dala, të krisura apo të thyera.
Në të folmen popullore, thirrej Pathua (patologu) Koçi Milori, mjeku popullor i pellgut të Vurgut e pastaj me famë e mrekullira të bëra deri në Tepelenë e Kurvelesh.
Sa njerëz, të të gjitha moshave, nga ato fëminore deri në pleqëri të thellë, të zhytur në pashpresën e tyre e të mbështjellë nga meraku i familjarëve, apo të mbetur në shtrat, ka ngritur në këmbë ky Koçi Milori!
Kushedi kush ka qenë ai që i ka bërë këtë shkrepje fotografie në një nga mijëra udhëtimet e tij drejt lutjes së njerëzve që kërkonin shpëtim e shërim prej tij.
Shpesh në këto udhëtime, doktori popullor Koçi Milori merrte me vete edhe djalin e vet, Thomain, atë që sot është një emër i përveçëm në mjekësinë ortopedike. Këto udhëtime dhe asistenca e tij e vëmendshme në seancat “operatore” të babait Pathua, në banesa apo në stanë, kanë qenë universiteti i tij i parë.
Asgjë më mirë se ortopedin, nuk do të mundej të bënte Thoma Milori, sot një mjek i kërkuar në disa shtete europiane për aftësitë e tij të rralla.
Profesori i tij është Koçi Milori. Ai i dha Thomait atësine, gjakun dhe profesionin ia futi në gjak.
Foton me mushkë të të ndjerit e të paharruarit Kiço Milori, e mora nga pllaka e varrit të tij në Vrion.
Atje me treguan edhe episodin e rrallë se si Pathoi i mijëra njerëzve, u bë edhe doktor i vetes. Kur ishte në moshë të thyer, i ndodhi edhe atij që të nxjerrë çapokun. Kujt t’i kërkonte ndihmë, përveçse aftësive dhe intuitës së tij profesionale?!
U tha djemve të lidhin çapokun e tij me këmbën e kalit. Pastaj i drejtonte që kalin ta shponin ngadalë me hosten e ai të lëvizte aq sa e dinte Koçi.
Kështu u bë dhe në pak minuta lëvizja e kalit në drejtimin e duhur, bëri të duhurën. “Zgjidhmeni, kaq ishte”, tha doktor Koçi. Kocka e çapokut gjeti folenë e vet dhe u desh vetëm ndonjë orë kohë që Pathoi të bëhej prapë po ai i pari, i gatshëm t’u përgjigjej thirrjeve të të tjerëve për doren dhe marifetet e tij, si Pathua gati i magjishëm. /
Thoma Nika – /sarandacity.al/
