Një incident i pazakontë ndodhi këtë të martë në doganën e Qafë Botës, në anën greke, ose në Mavromati, siç emërtohet kjo pikë nga fqinjët.
Një 39 shqiptar theu traun e doganës në anën greke dhe u turr drejt tokës fqinje, gjë që provokoi një ndjekje tipike policore deri në hyrje të Igumenicës.
Policia shqiptare dha versionin e saj për këtë ngjarje, duke publikuar emrin e rebelit por pa dhënë detaje se pse e ndërrmori këtë akt. 
“Falë bashkëpunimit të shërbimeve të Policisë Kufitare Sarandë dhe homologëve greke, ndalohet drejtuesi i një automjeti, i cili nuk iu bind Policisë Kufitare Shqiptare dhe asaj Greke, duke kaluar në menyrë të jashtëligjshme pikën e kufirit në Qafë-Botë.
Ditën e sotme, në pikën kufitare Qafë-Botë, një automjet tip Volksëagen me drejtues shtetasin Gardjan Mirukaj, 39 vjeç, banues në Lezhë, ka kaluar pikën kufitare duke mos iu bindur urdhrit të Policisë për të kryer kontrollin dhe verifikimin e dokumentacionit, duke kaluar në territorin grek në menyrë të jashtëligjshme dhe duke mos iu bindur për ndalim dhe Policisë Greke.
Si rezultat i bashkëpunimit të shërbimeve të Policisë Kufitare Sarandë falë dhe shkëmbimit në kohë të informacionit, është bërë i mundur ndalimi i këtij shtetasi, në hyrje të Igumenicës, ku gjatë kontrollit të ushtruar në automjet nuk i është konstatuar asnjë send i jashtëligjshëm.
Nga ana e Komisariatit të Policisë Sarandë do të kryhen veprimet e mëtejshme proceduriale”, thuhet nga pala shqiptare. /sarandacity.al/
