Pse Delvina duhet të jetë “basti politik” i znj. Denaj

Nuk dihet nëse deputetja në pritje e Sarandës, ministrja ende në detyrë Anila Denaj, ka vënë një bast me veten mbi atë se ç’gjurmë do lë në katër vitet e ardhshme në menaxhimin politik të zonës, si përfaqësuese e saj “atje lart”, por nëse jo, është mirë ta bëjë diçka të tillë. Një politikëbërje efektive është ajo që lë një gjurmë, që lë një model, një histori.

Basti i saj duhet të jetë Delvina. Po, ky qytet, ku një shesh tjetërlloj me kualitet urban apo një ujësjellës, kanë qenë pak, shumë pak në raport me një braktisje, ose ose me një paaftësi apo dështim, së paku deri më tani, për ta bërë ekonomikisht të jetueshëm. Delvina sot, 16 km larg një tregu të fuqishëm turistik, është gati në koma. Jo vetëm kaq. Në horizont s’duket asnjë vegim shprese në pjesën më të madhe të gjindjes së atyshme. Një optimist në Delvinë, vështirë ta gjesh; edhe ndër ata me një punë në shtet, me teserën e partisë qeverisëse në xhep.

Ndaj, Denajt i ka rënë në pjesë të ndryshojë rrjedhën e kësaj historie të mbrapshtë të një qyteti që, në rrethana në tjera, me resurset që ka, trashëgiminë dhe pozicionin në kontekst ekonomik, gjithë favore, do ishte një qoshe romantike e Jugut. Sepse i ka të gjitha, veç njeriut. Rolin e këtij njeriu të munguar, me dhunti vizionare, me plot pasion e dashuri për të bërë një histori suksesi, duhet të luajë znj. Denaj.

Edhe nga fakti se deri më tani, politikës shqiptare i mungon një model deputeti që, pasi zgjidhet në një zonë të caktuar, vendos të bëjë një histori suksesi duke ia ndryshuar faqen.

Denaj ka shansin të bëjë këtë. Gjithashtu ka shansin të rehabilitojë siglën e forcës së saj politike, e cila shihet jo pak vëngër në Delvinë.

Për këtë arsye, Delvina duhet të jetë shtëpia e saj në katër vite, për të qenë basti politik i saj i fituar. Kjo do e fusë në histori! /sarandacity.al/