Mijëra punëtorë në Greqi dolën në grevë për aksidentin më të rëndë hekurudhor në historinë e vendit, ku humbën jetën 57 persona.
Aksidenti i 28 shkurtit shkaktoi zemërim publik mbi gjendjen e rëndë të hekurudhave të Greqisë. Grevistët theksojnë se fajtorë janë neglizhencat e gjata, investimet e pamjaftueshme dhe shumë pak punëtorë, një trashëgimi e krizës së borxheve.
Në tren kishte 350 pasagjerë, përfshirë studentë që ktheheshin nga Athina në Selanik pas një fundjave të gjatë. Në Luginën Tempe, treni pasagjer u përplas me një tren mallrash që po afrohej në të njëjtën linjë.
Aksidenti shkaktoi protesta masive në të gjithë vendin. Më shumë se 10,000 njerëz u mblodhën në Athinë të dielën.
Punonjësit e hekurudhave janë në grevë që nga e enjtja, për shkak të së cilës janë ndërprerë shërbimet e trenave. Ata theksojnë se kërkesat e tyre për përmirësimin e protokolleve të sigurisë janë injoruar prej vitesh.
Sindikata ADEDY, e cila përfaqëson qindra mijëra punëtorë në sektorin publik, bëri thirrje për një grevë njëditore.
“Gabimi njerëzor”
Punëtorët e tjerë të transportit gjithashtu u larguan nga puna në shenjë solidariteti, duke ndërprerë shërbimet e metrosë, tramvajit dhe autobusëve në Athinë. Në grevë janë edhe punëtorët e anijeve.
Nxënës, studentë dhe mësues do t’i bashkohen protestave në qendër të Athinës.
Greqia shiti operatorin shtetëror hekurudhor, tani i quajtur Hellenic Train, si pjesë e një pakete shpëtimi ndërkombëtar në 2017 tek Ferrovie dello Stato Italiane në pronësi shtetërore të Italisë.
Qeveria fajëson për aksidentin gabimin njerëzor.
Kryeministri Kyriakos Mitsotakis u kërkoi falje qytetarëve të dielën, duke pranuar se neglizhenca e viteve mund të ketë kontribuar në aksident.
Ministri i Transporteve dha dorëheqjen pas aksidentit. Ministri i ri është Georgis Gerapetritis. Të mërkurën, ai duhet të takohet me ekspertë të trafikut nga Komisioni Evropian, i cili ka premtuar se do të ndihmojë. /sarandacity/al/
