Është ndarë nga jeta ai i cili në memorien kolektive njihej si krushku i Jovan Bregut, Perikliu, te “Pallati 176”.
Anastas Kristofori, një prej aktorëve që ka nxjerrë Bregu, më saktë Vunoi, është shuar në moshën 78-vjeçare.
Në një biografi të tij thuhet se ai lindi më 28 nëntor të vitit 1943 në Vuno. Pas mbarimit të studimeve të larta për aktrim në vitin 1970, në Akademinë e Arteve, filloi punën në Teatrin Kombëtar, ahere Teatri Popullor.
Mes shumë roleve në teatër, pati të tillë dhe në filma, ku i pati qe në vitin 1976, roli i Stavrit, te “Lulëkuqet mbi mure”.
Ka luajtur dhe rolin e një greku, atë të z. Mavrojanis në filmin “Misioni përtej detit” në vitin 1988 etj.
Gjithsesi, batuta më e famshme e tij nuk është batutë por një duf – Pupupupu…- te “Pallati 176”, kur mëson se e bija dashuron të birin e Jovan Bregut.
Anastas Kristofori është vlerësuar me titullin e lartë “Artist i Merituar”.
Së bashku me Robert Ndrenikën dhe regjisorin Dhimitër Anagnosti, ata përbëjnë trion më të famshme të artit filmik e skenik dalë nga Vunoi.
Ndërkohë, i ndjeri ishte dhe bashkëlagjar me Ndrenikën, si banues te “Myslym Shyrit” në Tiranë. /tesheshi.com/
