Një ndër pikat më të rrezikshme të rrugëve në Sarandë është Qafë Gjashta, kulmi i saj, aty ku duhet të shkosh në disa drejtime; hyrje e dalje nga Saranda, në Lëkurs e në Gjashtë.
Kjo pasi automjetet që vejnë e vijnë kanë një shpejtësi permanente në këtë pjesë, ku veç automjeteve mes tyre, ka dhe shumë këmbësorë që duhet të kalojnë nga njëra anë në tjetrën. Eshtë tipik vendi për një mbikalim, por që nuk ka asnjë shenjë apo sinjal që mund të ketë një të tillë.
Eshtë një zgjidhje që i takon si kompetencë Autoritetit Rrugor, por që Bashkia duhet t’ja kërkojë.
Gjatë çdo fushate politike, banorë të shqetësuar kanë kërkuar nga përfaqësues të çdo krahu politik një mbikalim.
Gjithashtu, përqëndrimi i disa lavazhove gjatë kësaj rruge bën që shumë herë lëvizja të kryhet e “detyruar” në korsinë e parakalimit madje shpesh drejtues të automjeteve futen në korsinë e krahut të kundërt.
Ndaj ndodh të ketë aksidente, si një i fundit të hënën, për fat pa pasoja në njerëz. /sarandacity.al/
