Që nga Kurban Bajrami: pse është “fikur” komunikimi virtual i doktor-deputetit Niko Kuri?

Deputeti Niko Kuri u shfaq krah koleges Anila Denaj në atë që tashmë është një aktivitet klasik prej përfaqësuesi populli në parlament.

Doktori i njohur i Sarandës, i cili kandidoi më 25 prill edhe nën një padakortësi të lehtë publike nga droja se nuk do mundet të ishte 100 përqind aktiv si bluzë e bardhë e vyer, vuri “bastin” e tij se do jetë ndër ata që nuk do shkëputet nga shërbimi ndaj pacientëve, paçka pra dhe angazhimit si deputet.

Më 7 maj, pasi ishte mbyllur gjithçka politikisht dhe ai e kishte siguruar mandatin, bëri një status në FB me titullin “Kthim në betejë”, si një mesazh se aty e ka shpirtin gjithsesi, te bluza e bardhë.

“Jeta është ndërkohë motivi dhe objektivi ynë! Ndaj jemi përsëri këtu pranë njerëzve, në shërbim të jetës çdo orë dhe çdo ditë!

Me respektin ndaj betimit dhe me mirënjohjen e madhe  ndaj atyre që më bekuan me dashurinë e tyre pa kufi më 25 prill si përfaqësues në Parlamentin e Shqipërisë!

Faleminderit Finikas, Sarandiotë, Konispolatë, Delviniotë, Himariotë, Nartiotë, Vlonjatë! Ringjallja dhe shpresa le të shërrojë plagët e trupit dhe të shpirtit tuaj dhe jeta t’u bëhet më e begatë në këtë vend të bukur!”, do shkruante ai ndër të tjera.

Por ky do qe ndër të fundit statuse të tij, pasi ç’prej atëherë, nuk dihet pse, Facebook-u i tij është “fikur”.

Tejet aktiv aty në komunikimi me publikun, sidomos gjatë fushatës, pason më pas një boshllëk i pashpjegueshëm. Më saktë, i fundit postim i doktor Nikos është ai me urimin për festën islame të Kurban Bajramit, datuar më 13 maj.

“Të dashur besimtarë Myslimanë,

Me rastin e festës së Fiter Bajramit më lejoni t’u uroj nga zemra Shendet, Lumturi, Begati dhe Harmoni në familjet tuaja. Kjo ditë dhe të gjitha ditët e jetës tuaj të jenë  plot dashuri, mirëqenie, mirëkuptim, paqe dhe aspirata të larta njerëzore  për të cilat kemi nevojë të gjithë!

Zoti ju bekoftë!”.

Nuk dihet pra nëse ka një arsye konkrete, apo është diçka e lënë pas dore nga ana e doktorit-deputet, kjo “fikje” e dritares së tij virtuale komunikative me publikun, për vetë peshën e shtuar të rëndësisë publike si person. /sarandacity.al/