Qeveria, vendim për areoportin e Sarandës: hapet gara, gati shpronësimet

Ministrja e Transporteve dhe Infrastrukturës Belinda Balluku njoftoi hapjen e garës për ndërtimin e aeroportit të Sarandës.

Ajo shtoi se gara do të jetë e hapur në faqen e ministrisë duke filluar nga data 2 gusht deri në datë 23 shtator 2021.

“Prej kohësh, kryeministri Rama ka lançuar strategjinë për zhvillimin  e Aviacionit Civil duke njoftuar si ky zhvillim do të vijë.

Pas kontratës së re të firmosur nga qeveria dhe koncensionari i aeroportit të Tiranës, pas hapjes së aeroportit të Kukësit që ka arritur normalitetin duke kryer fluturime përditë, pas firmosjes së kontratës për aeroportin e Vlorës, tani është radha për lançimin e garës për aeroportin e Sarandës.

Ministria e Financës ka marrë përsipër kostot për procedurën e koncensionit. Është një procedurë e lehtë pasi shteti nuk ka përfshirje direkte. Shteti nuk ofron një garanci financiare. Do të jetë investim privat që do të kushtojë 37 milionë”, tha Balluku.

Sipas saj, ka arsye të forta ekonomike që Saranda të ketë një aeroport.

“Do t’i shtohet infrstrukturës ajrore pasi është një kollonë e fortë për zhvillimin e vendit. Kemi pasur interes nga grupe të ndryshme në Europë dhe jam shpresëplotë që edhe ky proces do të jetë i sukseshëm.

Në Sarandë presim që në 3-4 vite të elaborojmë 1 milionë pasagjerë. Investitori do të ketë mbështetjen totale të shtetit dhe ministrive por procesi i shpronësimeve do të bëhet nga shteti bashkë me Agjensinë e Shpronsimeve. Unë jam e sigurt që banorët e Sarandës do të jenë te kënaqur nga ky lajm i ri”, tha Balluku. /sarandacity.al/