Rama në Ta Nea: E vërteta për “pronat e minoritetit”

Në një intervistë për greken Ta Nea, kryeministri Rama komentoi pretendimin e Athinës mbi pronat e minoritetit, duke e mohuar atë si problem specifik.

“Nuk kemi pasur problemin e mbrojtjes së pronës së minoritetit grek në Shqipëri. Kemi pasur problem me mbrojtjen e të drejtave të pronësisë në përgjithësi.

Minoriteti grek vuajti për shkak të këtij problemi, sikundërse gjithë të tjerët.

Ne e kemi trajtuar këtë çështje përmes një legjislacioni të ri, po shohim rezultate pozitive dhe po vazhdojmë përpara përsa i përket kësaj çështjeje”, shpjegoi i pari i qeverisë shqiptare.

Sa i përket (mos)marrëveshjes detare, ai tha: “Ka energji pozitive në marrëdhëniet tona, ka një predispozitë të mirë nga të dyja palët për ta zgjidhur çështjen në mënyrë të qartë, përmes përcjelljes në Hagë, duke treguar besim tek një palë e tretë. Është një arritje e madhe, por ende nuk e kemi gjetur zgjidhjen”.

Ndërsa sa i përket aspektit tjetër, atë të raporteve të përgjithshme mes dy vendeve, Rama tha se politika duhet të marrë shembull nga populli.

“Unë kam thënë që politika nga të dyja palët nuk ka arritur të ndjekë popujt, të cilët kanë marrëdhënie të mira.

Shqiptarët në Greqi janë integruar, flasin me punën e tyre dhe respektin ndaj vendit. E njëjta gjë edhe këtu, grekët që jetojnë këtu si qytetarë janë në shtëpinë e tyre”. /sarandacity.al/