Pas rasteve me kryebashkiakun e Lushnjes dhe me ata që kishin përgatitur tenderin e uniformave të Policisë, ndër goditjet e SPAK-ut ditët e fundit, kryeministri Rama përcolli një paralajmërim për ministrat.
“Në një kohë të shkurtër, jo të gjatë, ky shtet të kalojë në një nivel tjetër të nivelit të Prokurimeve Publike, në radhë të parë duke garantuar që çdo institucion funksionon si hallkë, jo si bajrak, dhe duke funksionuar kështu, funksionon si pjesë e një zinxhiri ku komunikim duhet të jetë 100% i garantuar.
Rekomandimet e APP nuk janë as në Bibël e as në Kuran, edhe pse këto përsëri hanë diskutimet e tyre mes besimtarëve, por ama sikur në një rast të vetëm rekomandimet të bien në një vesh aq të shurdhët sa të mos ketë fare përgjigje, a thua se kjo APP mbyll letra në shishe dhe i hedh në det, çdo rast i tillë do të shkojë në SPAK nga kryeministria, pastaj a është i qëllimshëm apo injorancë këtë çështje pastaj hanë hetimet”, tha i pari i qeverisë në një takim me ministrat.
Sipas Ramës, 30-50% e tenderave janë vetëm me një operator ekonomik dhe “lepuri fle”, siç tha ai, të “qepja me dorë” e kritereve për kualifikimin që ndikojnë, sipas tij, në pjesëmarrjen dhe ngushtimin e konkurrencës së operatorëve.
“Në problematikën e prokurimeve, armiku kryesor janë kriteret e ‘qepura me dorë’ për kualifikim, që ndikojnë në uljen e pjesëmarrjes dhe në ngushtimin e hapësirës së konkurrencës së operatorëve ekonomikë në procedurat e prokurimit publik.
Janë asistuar nga APP 936 proceduara dhe nga këto, mesatarja e ofertave të kualifikuara është 2.56.
Nga ana tjetër, analiza e të gjitha procedurave të zhvilluara nga institucionet, rezulton se nga 25, 21 prej tyre, 30-50% të procedurave i kanë vetëm me një operator ekonomik, pavarësisht se procedura është e hapur”, argumentoi shefi i qeverisë. /sarandacity.al/
