“Skandali” i Ina Zhupës, Bashka: ja e vërteta e gërryrjeve te grykëderdhja e Bistricës

Bashkia Sarandë ka reaguar lidhur me një akuzë të ngritur nga deputetja demokrate në pritje Ina Zhupa, e cila ka hedhur dyshime rreth një gërryerje natën në grykëderdhjen e Bistricës në det.

Aty, Zhupa ka parë e lexuar një skandal pushteti.

Por nga Bashkia ofrohet një tjetër e vërtetë mbi atë realitet.

“Nisur nga shqetësimet dhe ankesat e disa qytetarëve adresuar Bashkisë Sarandë, mbi punimet që janë duke u kryer në grykëderdhjen e lumit Bistricë, në Kanalin e Çukës, sqarojmë se:

Punimet nuk janë të lidhura me asnjë subjekt privat dhe as me krijimin e ndonjë plazhi atje.

Mjetet që janë duke punuar janë duke marrë rërën e detit, të sjellë si aluvion gjatë dimrit, me qëllim që të ulen sa të jetë e mundur kostot e pasurimit me rërë të plazheve publike përgjatë shetitores në Sarandë dhe që materiali të jetë produkt natyral i detit dhe jo material inert. (proçes që kryhet çdo vit në fillim të sezonit turistik)

Sqarojmë se traseja e rrugës e çelur në grykëderdhjen e lumit në Kanalin e Çukës, është në funksion të këtij operacioni dhe me përfundinin e tij, ajo do të rikthehet në gjendjen e mëparshme.

Gjithashtu sqarojmë se, për të mos penguar pushuesit që perdorin stacionet e plazhit publik përgjatë shëtitores, punimet do të kryhen kryesisht gjatë orëve të para të mëngjesit.

Shpresojmë në mirëkuptimin dhe mbështetjen e qytetarëve për këtë operacion disaditor që po kryejmë, në emër të interesit publik dhe sistemimit të plazheve publike të qytetit”, thuhet në reagim-sqarimin e Bashkisë. /sarandacity.al/