Ministres me dukje fëminore, duke qenë pikërisht e Fëmijëve, një dikaster i ri ky qeveritar, i është marrë jangllësh një frazë e thënë shpengueshëm, teksa është pyetur në lidhje me abuzimin mbi fëmijët, nënkuptuar tragjedinë e Fierit, ekzekutimin e një të mituri 8-vjeç.
Thënë “jam shumë vonë e duhet të lëviz” para gazetarëve, ajo tashmë po kryqëzohet nga media, e sigurisht dhe nga opozita.
Ina Zhupa kërkoi dorëheqjen e Muzhaqit, duke shkruar:
“Dy realitete krejt të ndryshme kishte sot në Tiranë. Familjarët e Mateos, të dërrmuar nga dhimbja, që kërkojnë ndihmën e qytetarëve për të firmosur kthimin e dënimit me vdekje dhe Ministrja e Edi Ramës për fëmijët, që shpërfill me buzëqeshje dhimbjen e pamasë për vrasjen makabre të vogëlushit.
Bora Muzhaqi ikën pa thënë asnjë fjalë për të, pa treguar aspak dhimbsuri, përulësi dhe përgjegjshmëri për detyrën e saj.
Jam e revoltuar si nënë dhe si qytetare, kur shoh ministren për Fëmijët të na përpalsë në fytyrë VKM-në e detyrave të saj.
Zonja Ministre! Ju sot duhet të jepni dorëheqjen, sepse nuk jeni e denjë të bëni politika për fëmijët tanë!
Jeta dhe mirëqenia e një fëmije është çështje shumë më e madhe sesa një VKM. Por ju këtë zonja ministre nuk mund ta kuptoni, sepse jeni në atë detyrë jo për meritën tuaj, por sepse Edi Ramës i duhet buzëqeshja juaj!”.
Si ndodhi? Dialogu:
Gazetarja: Donim t’ju bënim disa pyetje mbi abuzimet.
Bora Muzhaqi: Jam shumë vonë, më duhet të lëviz.
Gazetarja: Mund të përgjigjeni se dy minuta ju marrim. Kjo është përgjigjia juaj? Drejtoni një institucion…
Bora Muzhaqi: Institucioni im nëse do të kishit lexuar VKM-në që tregon përgjegjësitë e mia, do e kishit kuptuar përgjigjen time. /sarandacity.al/
