Tre kryebashkiakë të zonës – Sarandë, Delvinë e Finiq, të cilët pak ose aspak ndodh të shihen bashkë, duke diskutuar apo trajtuar projekte të përbashkëta, u afruan e pozuan me kreun e BE-së në Tiranë Luigi Soreca.
Ishte një aktivitet në Gjirokastër, i cili i bëri bashkë ata.
“Në Gjirokastër me kryebashkiakët, shoqërinë civile dhe mediat për të prezantuar projektet e reja të financuara nga BE që mbështesin bashkitë shqiptare në procesin e pranimit në BE.
BE po mbështet fuqishëm Shqipërinë drejt përmirësimit të shërbimeve publike, decentralizimit dhe zhvillimit ekonomik në nivel lokal – ku integrimi në BE ndodh çdo ditë”, informoi Zyra e Brukselit në Tiranë, për t’u pasuar nga mesazhi i Soreca-s.
“Kënaqësi të ritakohesha në Gjirokastër me kaq shumë kryetarë bashkish. Sjellja e qeverisjes vendore dhe qytetarëve shqiptarë më pranë BE-së është thelbi i ndihmës që BE-ja i jep Shqipërisë. Shkëmbim shumë i frytshëm mbi rolin e qeverisjes vendore në procesin e integrimit në BE.
Pata gjithashtu kënaqësinë të informoja kryetarët e bashkive se si BE po rrit mbështetjen e saj drejt infrastrukturës dhe shërbimeve publike vendore, zhvillimit ekonomik lokal, inovacionit, krijimit të vendeve të punës, mbrojtjes së mjedisit dhe fuqizimit të të rinjve në Shqipëri”. /sarandacity.al/
