Bashkia Finiq raporton se ka bërë gati të gjitha shkollat e saj për nisjen e vitit të ri shkollor.
Ajo i mëshon fort procesit të dezinfektimit, pasi siç thotë, virusi është akoma mes nesh.
“Bashkia Finiq, në këtë fillim të vitit të ri shkollor, tashmë ka ndërmarrë të gjitha veprimet e nevojshme për kthimin e sigurt të nxënësve në bankat e shkollës.
Ekipet e drejtorisë së shërbimeve të bashkisë vazhduan punën me pastrimin, riparimin dhe lyerjen e plotë të oborreve, shkollave dhe klasave, për funksionimin e tyre sa më të mirë.
Në të njëjtën kohë, në të gjitha shkollat fillore dhe të mesme, u krye dezinfektimi i nevojshëm, pasi virusi COVID-19 është ende në mes nesh.
Shërbimet shëndetësore janë në gadishmëri për të zbatuar të gjitha protokollet shëndetësore, duke siguruar për studentët e vegjël, antiseptikë, dezinfektues dhe gjithçka të nevojshme për respektimin e rregullave të higjienës.
Gjatë gjithë kohës, Kryetari i Bashkisë, z. Kristo Kiço, ka ndjekur proçesin, duke deklaruar: ‘Ne vazhdojmë të përpiqemi për një mjedis të sigurt dhe të shëndetshëm në shkolla, shëndeti dhe siguria e nxënësve është qëllimi dhe përparësia jonë kryesore’”, thuhet nga Bashkia minoritare. /sarandacity.al/
