Si destinacion të fundjavës, kryebashkiaku Gurna zgjodhi xhaminë në qendër të qytetit, e cila daton që nga shekulli i kaluar.
Në një të dhënë telegrafike, i pari i Sarandës shkruan se ajo është ndërtuar me kontributin e motrave të Mbretit Zog.
“Xhamia e Sarandës është ndërtuar në vitin 1935, me kontributin e motrave të Mbretit Zog. Në vitin 1967 ajo pushoi së funksionuari si objekt kulti duke tjetërsuar edhe funksionin e saj, për t’iu rikthyer besimtarëve në vitin 1991.
Xhamia vazhdon të jetë në të njëjtin imazh fizik dhe strukturë si në vitin e ndërtimit. Përjashtim bën vetëm minareja, e cila, pasi u shemb në vitin 1967 u rindërtua në vitin 2004.
Xhamia e Sarandës, është veshur me gurë të skalitur së jashtmi, karakteristikë kjo e ndërtimeve të asaj kohe në jug të vendit. Pamja tërheqëse e objektit, vendndodhja në zemër të qytetit të dhe misioni i saj për qetësimin e shpirtërave dhe kultivimin e fuqisë dhe harmonisë së besimit, e bëjnë këtë objekt kulti të frekuentuar nga besimtarë të të gjitha moshave.
Xhamia e Sarandës tërheq gjatë sezonit veror, edhe mjaft turistë, të cilët e vizitojnë atë plot kërshëri”, shkruan Gurma për këtë objekt kulti të besimit islam. /sarandacity.al/
