Kryetari i grupit parlamentar socialist, Taulant Balla, duke iu përgjigjur akuzave të PD-së për ngritjen e një qendre të përbashkët kufitare mes Greqisë dhe Shqipërisë, tha se kjo “nuk është marrëveshja e detit me Greqinë që është votuar në 2009”.
“Nëse nuk do të kishte qenë grupi parlamentar i PS, për ta çuar në Gjykatën Kushtetuese atë marrëveshje, Shqipëria do të kishte humbur mijëra metra katrorë det”, tha Balla, që më pas shpjegoi atë që pritet të ndodhë në Kakavijë.
“Kjo nuk është marrëveshja e detit. Përkundrazi, qendra ngrihet në tokën greke, ku punonjës të policisë shqiptare e asaj greke do punojnë bashkë në luftën kundër trafikut”, tha Balla.
Siç tha ai, “këto janë marrëveshje kuadër, pasi edhe mes vendeve anëtare të Bashkimit Evropian, edhe mes vendeve që bëjnë pjesë në hapësirën Shengen funksionojnë qendra të tilla”.
Balla tha se “qendra do të funksionojë në doganën e Kakavijës. Informacioni që do të qarkullojë në këtë qendër është ndihmesë për të dy strukturat, si për policinë shqiptare, dhe atë greke, por edhe mes doganës shqiptare dhe asaj greke për të parandaluar çdo lloj forme trafikimi”. /sarandacity.al/
