E paimagjinueshme që një ish-zv.ministër të bjerë në pranga nën akuzën e zjarrvënies së qëllimshme. Fjala është për Albert Gajon, nr. 2 të Integrimit në qeverisjen e PD-së. Roli i tij në zjarrvënie, sipas komunikatës së policisë, ka të bëjë me profilin e tij si fermer në zonën e Leskovikut.
“Dogji me zjarr një sipërfaqe me vreshtari, zjarri përfshiu më pas edhe një sipërfaqe tjetër me bimësi të ndryshme, vihet në pranga autori i dyshuar.
Specialistët për Hetimin e Krimeve në Komisariatin e Policisë Kolonjë, bënë arrestimin në flagrancë të shtetasit A. G., 59 vjeç, banues në Tiranë, pasi në vendin e quajtur ‘Sarandapor’, në Leskovik, Kolonjë, me veprimet e tij ky shtetas ka shkaktuar rënien e zjarrit në një sipërfaqe me vreshtari, duke përfshirë më pas edhe një sipërfaqe tjetër me bimësi.
Materialet i kaluan Prokurorisë së Rrethit Gjyqësor Korçë për veprën penale ‘Shkatërrimi i pronës me zjarr’“, thuhet në komunikatën policore. /sarandacity.al/
