Homazhe shtetërore për policin e Lezhës, shpallet “Dëshmor i Atdheut”

Qeveria vendosi të shpallë “Dëshmor të Atdheut”, nënkomisar Saimir Hoxhën, i cili humbi jetën dje në krye të detyrës, i qëlluar 21-vjeçari Aldi Rama, si dhe mori vendim për trajtimin e menjëhershëm financiar të familjarëve të tij.

Lajmin e bëri të ditur për mediet ministri i Brendshëm Bledi Çuçi.

“Dje humbi jetën në mënyrë tragjike në krye të detyrës nënkomisar Saimir Hoxha. Sot ne morëm vendimin për shpalljen ‘Dëshmor i Atdheut’ të nënkomisar Saimir Hoxhës dhe njëkohësisht qeveria mori vendim për trajtimin e menjëhershëm financiar të familjarëve”, tha Çuçi.

Ministri theksoi se “sigurisht që familjarëve dhe veçanërisht dy fëmijëve do t’i mungojë babai i tyre, por në asnjë moment në jetën e tyre nuk do t’u mungojë përkujdesja e shtetit dhe shoqërisë, për të cilën Saimir Hoxha dha jetën”.

Kryeministri Edi Rama tha pas homazheve ky se është një çast i rëndë për të gjithë.

“Padyshim që është një çast i rëndë për të gjitha forcat tona të Policisë së Shtetit. Patjetër edhe për shoqërinë dhe për shtetin, por mbi të gjitha për familjen. Duke i shprehur ngushëllimet vëllazërore familjes, duke i shprehur ngushëllimet më të ndjera gjithë kolegëve që e kanë njohur nga afër këtë Dëshmor të ri të Atdheut, por edhe të gjithë punonjësve të Policisë, e shoh të udhës të bëj me dije se, qeveria ka vendosur sot mbështetje financiare të konsiderueshme për familjen”, tha Rama. /sarandacity.al/