Detaje të reja nga ngjarja në fshatin Janjar, ku gjeti vdekjen nga derri i egër 65-vjeçari Bekim Brahimi.
Viktima kishte dalë nga shtëpia e tij mëngjesin e së mërkurës për të mbledhur sherebelë.
Me vete kishte marrë dy gomerë dhe qentë që shpeshherë ai i merrte edhe kur dilte për gjah.
Kur kish shkuar mesdita, rreth orës 3-4 dhe ai ende nuk ishte kthyer në shtëpi, kjo e shqetësoi bashkëshorten e cila kërkoi ndihmën e fqinjëve të vet për ta kërkuar.
U nisën në kërkim të tij dhe rreth 1 km larg, në mal, në kufi me Greqinë u përballën me një pamje tronditëse.
65-vjecari Bekim Brahimi u gjet i pajetë në tokë mes një pellgu gjaku, afër tij ishin dy qentë dhe dy gomerët që kishin të ngarkuar edhe thasët me sherebelë.
Viktimës gjaku i rridhte nga krahu i majtë që tregonte se ishte pothuajse i shkëputur deri afër zemrës.
Sipas kryeplakut të fshatit Janjar Neshat Mehmeti, që portretin e tij e bën si njeri tepër pozitiv dhe që u vinte shpesh në ndihmë bashkëfshatarëve të tij me linjën Janjar – Sarandë dhe anasjelltas, ndoshta qentë kanë pikasur ndonjë derr të egër i janë turrur dhe kafsha më pas i është turrur viktimës duke e lënë atë të pajetë.
Ndërsa pamja ishte e tepër e rëndë për fqinjët e tij që e gjetën, vështirësia tjetër ishte transportimi i trupit të viktimës.
U desh të vihej përsëri në fshat dhe të sajohej një barelë për transportimin e trupit të pajetë.
Gjithë kjo sorollatje bëri që trupi i pajetë i 65-vjecarit Bekim Brahimi të shkojë në familje rreth orës 23.00.
I ndjeri kishte pak kohë që kishte dalë në pension.
Ka katër fëmijë, 3 vajza të martuara dhe një djalë që punon prej vitesh në Igumenicë, Greqi. /sarandacity.al/
