Artan Lame, kreu i Kadastrës Shqiptare, paralajmëroi pastrim zyrash në nivel lokal, duke përmendur dhe Sarandën, duke ftuar profesionistë që të jenë pjesë e stafeve të atyshme.
“Shpall sot thirrjen për drejtues të rinj, në pjesën më të madhe në zyrave rajonale. Thirrjet për për të zëvendësuar drejtuesit e komanduar apo drejtues që nuk justifikuan punën nga Shkodra, Lezha, Kruja, Durrës, Drejtoria e Tiranës, Korçë, Sarandë, Fier.
Lista e plotë do e shikoni të hënë tjetër ku do jetë dhe shpallja zyrtare në site. Sfidë me këdo, le të vijë njëri këtu nesër dhe pasnesër fillon, punë çdo inxhinier, fillimisht me kontratë”, shtoi Lame.
Duke pranuar të metat e shërbimeve ndaj qytetarëve në çështjen sensitive të pronësisë, Lame sfidoi ata që e konsiderojnë veten të zotë që të provohen pikërisht në këtë sektor.
“Ka specialistë që nuk duan e nuk duan ta kuptojnë që shmangia e një qytetari sot nuk zgjidh asgjë. Ka drejtues, dhe këtu ju drejtohem në veçanti atyre që nuk duan të kuptojnë, që vendosja e tyre në ato poste nuk është bërë se kanë çliruar Shqipërinë, por se është besuar se do të dijnë të shërbejnë dhe organizojnë punën në drejtoritë që ju janë besuar.
Në këto kushte dëshiroj të shpall hapjen e thirrjes për drejtues të rinj në një pjesë të madhe të zyrave rajonale të Kadastrës.
Jam i bindur se gjithë llafollogët e fejsbukut do ulen të dekurajojnë këdo që do dëshirojë të përfshihet në këtë thirrje. Mos u çudisni, e kanë bërë gjithmonë. Mos u tutni!
Ti djalë a vajzë që ke mbaruar universitetin për inxhinjeri, juridik apo ekonomik, ti specialisti që ke vite që punon në administratë dhe mendon se ka ardhur koha të avancosh në karrierë, ti kandidati për deputet që e dije se nuk do fitoje për shkak të numrit në listë, por që je i bindur në kapacitetin tend, ti eksperti i fushë, që mendon se e di se si gjejnë zgjidhje problemet e stërkomplikuara të pronës në Shqipëri, por nuk ke patur rast të provosh veten, mos u tutni, ejani dhe aplikoni“, tha Lame. /sarandacity.al/
