SPAK ka dhënë goditjen e radhës duke arrestuar Thoma Gëllçin, deri dje drejtor i përgjithshëm i RTSH-së, nën akuzën e korrupsionit.
Bashkë me të janë arrestuar dhe tre punonjës të institucionit, por të cilëve u janë dhënë vetëm inicialet.
Thoma Gëllçi, një ish-gazetar i ZP që në vitet ’90, quhej ndryshe me shpoti nga studentët e kohës, ata të Lëvizjes së Dhjetorit, dhe si “Gëllçi i zi”.
Prej vitesh në SHBA, të gjithë bën habi se si Rama ia besoi atij drejtimin e RTSH-së, që thuhet se ishte një qokë ndaj të vëllait, Olsit, pasi ky i fundit dhe Gëllçi ishin njohur e miqësuar në SHBA.
Gëllçi është njohur ndryshe si një ndër njerëzit e afërt të Ilir Metës, por që në drejtimin e RTSH-së, lajmet e këtij institucioni qenë gjithsesi korrekte dhe të paanshme.
Madje nën Gëllçin u pasurua dhe programacioni i kësaj mediaje shtetërore. Por gjithsesi, kjo nuk e ka shpëtuar nga akuzat për korrupsion. Ndaj, në vend që të jetë te familja në SHBA, do i duhet të kalojë kohë në qeli, në varësi të hetimeve dhe gjykimit.
Njoftimi i SPAK:
“Prokuroria e Posaçme Kundër Korrupsionit dhe Krimit të Organizuar në datën 28.02.2020 ka regjistruar proçedimin penal nr.82/2020 për veprën penale “Shkelja e barazisë së pjesëmarrësve në tendera apo ankande publike”, parashikuar nga neni 258 i Kodit Penal. Hetimet në kuadër të këtij proçedimi janë kryer në bashkëpunim me Drejtorinë e Përgjithshme të Policisë së Shtetit. Pas kryerjes së veprimeve hetimore gjithëpërfshirëse lidhur me këtë proçedim rezultoi se:
Në proçedurën e prokurimit “Proçedurë e hapur”, me objekt “Blerje pajisje për kanalin RTSH Agro”, me nr. REF-90011-10-16-2018, me fond limit 86. 908 550, 00 lekë (pa tvsh), zhvilluar në datën 09.11.2018 nga autoriteti kontraktor Radio Televizioni Shqiptar, janë konstatuar shkelje ligjore, të kryera nga ana e tre anëtarëve të Komisionit të Vlerësimit të Ofertave, konkretisht të hetuarve J.T., A.M. dhe E.M., shkelje këto të kualifikuara në elementët e veprës penale “Shkelja e barazisë së pjesëmarrësve në tendera apo ankande publike”, kryer në bashkëpunim, parashikuar nga neni 258 (para ndryshimeve me ligjin nr. 43/2021) të Kodit Penal.
Po kështu nga hetimet ka rezultuar se edhe shtetasi TH.G., me detyrë ish-Drejtor i Përgjithshëm i Radio Televizionit Shqiptar, ka kryer shkelje ligjore në këtë proçedurë prokurimi, shkelje këto të kualifikuara në elementët e veprës penale “Shpërdorimi i detyrës”, parashkuar nga neni 248 i Kodit Penal.
Për këtë arsye, Prokuroria e Posaçme Kundër Korrupsionit dhe Krimit të Organizuar, paraqiti në Gjykatën e Posaçme të Shkallës së Parë për Korrupsionin dhe Krimin e Organizuar, kërkesën për caktimin e masave të sigurimit personal “Arrest në burg” ndaj shtetasve nën hetim J.T., A.M., E.M. dhe Th.G. Gjykata e Posaçme e Shkallës së Parë për Korrupsionin dhe Krimin e Organizuar, me vendimin nr.79 datë 07.10.202, vendosi: “Pranimin e kërkesës së Prokurorisë së Posaçme Kundër Korrupsionit dhe Krimit të Organizuar Tiranë.
Vendosjen e masës të sigurimit personal “Arrest në burg” ndaj shtetasit nën hetim Th.G., i dyshuar për kryerjen e veprës penale “Shpërdorimit i detyrës, parashkuar nga neni 248 i Kodit Penal.
Vendosjen e masave të sigurimit sigurimit personal “Arrest në burg” ndaj shtetasave nën hetim J.T., A.M. dhe E.M., të dyshuar për kryerjen e veprës penale “Shkelja e barazisë së pjesëmarrësve në tendera apo ankande publike”, kryer në bashkëpunim, parashikuar nga neni 258 (para ndryshimeve me ligjin nr. 43/2021) dhe 25 të Kodit Penal.
Ky vendim është ekzektuar nga Drejtoria e Përgjithshme e Policisë së Shtetit. /tesheshi.com/
