Interesante: kur në shëtitore buçet(pafajshëm) kënga për Enverin!

Pakkush e di apo e ka nuhatur që vargjet e një prej këngëve më të njohura të festivaleve në RTSH para viteve ’90, i kushtohej Enverit. Kjo ka bërë që ajo të interpretohet dhe dëgjohet me shumë kënaqësi; dje, sot e në çdo kohë, ku veç në një rast, fjala “parti” është zëvëndësuar me fjalën “Shqipëri”.

Fjala është për “Pragu i vegjëlisë”, kënga e cila erdhi pak pas librit autobiografik “Vitet e vegjëlisë”. Aty, pa u përmendur askund Enveri, në asnjë frazë të tekstit, diktatori vihet në vetën e parë, pasi po viziton Gjirokastrën e tij.

Vargjet janë të Xhuliana Jorganxhi, ndër prodhimtaret më të mëdha e më cilësore të teksteve të këngëve në vite.

“Erdha prap te ky prag i dashur,

ku gjithçka me zë të ngrohtë më thotë: mirësevjen,

dhe çdo zemër portat mi mban hapur,

mua birin tënd me mall më pret e më përcjell.

 

Te ty njoha unë nënë e babë,

ma dëgjove ti të parën fjalë,

dhe hapin që hedh, kudo në atdhé,

ti e ndoqe veç me sytë e nënës,

lule bëje biro këtë dhé….”, janë disa nga vargjet e këngës, intepretuar atëbotë nga Myfarete Laze.

Kënga në fakt është mjaft e arrirë dhe i ka rezistuar kohërave. Edhe tekstin e ka të arrirë, pavarësisht fabulës që fsheh, pra vetë Enverin.

Dhe mund të konsiderohet kënga më e famshme për Enverin, pa e ditur që është pikërisht për të, pasi emri i tij mungon tërësisht.

Tejet interesante kjo, pasi përbën dhe një kuriozitet artistik në vetëvete.

Dhe pikërisht kjo u këndua në një koncert të Qendrës Kulturore Sarandë, organizuar në shëtitore.

Sigurisht, është zgjedhur në repertor si një këngë e shumëpëlqyer, një status që ia ka dhënë koha, pa qenë nevoja për lexime ideologjike mes rreshtash.

Bravo interpretimi, sidomos në duet! /sarandacity.al/