Është gjë e bukur të dëgjosh nga një kryeministër se si iu injekton vartësve të vet në qeveri, ministrave në këtë rast, rregulla të ndryshme etike, por sidomos ndjeshmërinë ndaj popullit në komunikim me të.
Kështu veproi Rama në të parën mbledhje të qeverisë së re, ku veçoi, ndër të tjera: “Nuk më intereson asnjë reformë, asnjë investim, asnjë rrugë dhe nuk do pranoj asnjë justifikim para cilësisë së marrëdhënieve të kësaj qeverie me çdo njeri që troket në derën tonë për të zgjidhur një hall. Kjo derë është platforma e bashkëqeverisjes”.
Por kjo është e bukur kur e dëgjon në nisje të një qeverisje e jo në vijim të asaj pas 8 vitesh.
Sepse, aspekti etik ka qenë ndër cenet më të mëdha të qeverisjes 8-vjeçare të Ramës; ka qenë ai që shpalosi më së miri diferencën mes fjalëve dhe realitetit. Ka qenë ai që i ka vënë vulën e padrejtësisë një qeverisjeje që vërtet është rrekur të reformojë drejtësinë, atë të aspektit juridik, porse s’ka mundur dot të ofrojë drejtësi në sens etik dhe stil qeverisjeje.
Fakti që Rama i lëshon të tilla porosi apo këshilla pas 8 vitesh, është një vetëdenoncim se shumëçka nuk ka shkuar në këtë drejtim.
Dhe të mendosh se është fjala për diçka që nuk kërkon para si kosto realizimi, është diçka që kërkon moral, të cilin o e ke o nuk e ke. Dhe vlen kjo për çdo vendimmarrës, të çdo niveli. /sarandacity.al/
