Pikëpyetja e madhe pas kthese: kush e goditi avokatin Marjel Mejdi mesditën e 5 korrikut të rruga e Portit?

Aleks Rexha dhe Edmond Fufi nuk janë ata që goditën avokatin Marjel Mejdi më 5 korrik në rrugën e Portit.

Këtë e ka pohuar vetë ky i fundit në një deklaratë noteriale, pas së cilës dyshja Rexha – Fufi, të afërm të njëri-tjetrit, kanë kërkuar lirinë nga gjykata, pasi aktualisht janë në “arrest shtëpie”.

Pak pas ngjarjes së rëndë, e cila la pasoja fizike te Mejdi, ky do deklaronte se ata që e goditën ishin nga Gjirokastra dhe Mamurasi. E saktë: si Rexha e si Fufi janë njëri nga Gjirokastra e tjetri nga Mamurasi, ky i fundit dhëndër në familjen e të parit.

Do deklaronte gjithashtu se me ta është në një gjyq, si avokat e si familjar për çështje prone. E saktë dhe kjo. Por ajo që ka rezultuar e pasaktë ka qenë autorësia e sulmuesve e cila iu është atribuuar atyre.

Pamjet filmike në vendngjarje nuk kanë shfaqur asnjë prej të akuzuarve në atë që ndodhi te rruga “Mitat Hoxha” në Kodër, te Porti, mesditën e 5 korrikut.

Po ashtu, të tjera pamje filmike të sjella si alibi, kanë treguar se dyshja Rexha – Fufi kanë qenë në tjetër vend në çastin kur është sulmuar Mejdi, më saktë në afërsi të pronës së pretenduar nga dy palët.

Kapakun e vë më pas vetë pohimi Mejdit me deklaratë noteriale se nuk janë ata që e goditën më 5 korrik.

Tashmë vjen pikëpyetja e madhe, pasi janë parë dhe filmimet:

Kush dhe për ç’arsye e goditi avokatin Marjel Mejdi mesditën e 5 korrikut ditën për diell, mes njerëzve, në një zonë të populluar? /sarandacity.al/