Pas së parës viktimë nga zjarret një ditë më parë në Gjirokastër, kryeministri Rama, veç ngushëllimeve, ka kujtuar se kjo gjëmë natyrore ka kapluar gjithë mesdheun.
“Vazhdojnë papushim me mundin e sakrificat e forcave të emergjencave civile e të atyre të ushtrisë, operacionet tejet të vështira të shuarjes së zjarreve, të cilat janë përhapur si epidemi në krejt vendet e Mesdheut e jo vetëm.
Ngushëllime vëllazërore familjes së të ndjerit Andrea Haxhiaj, që fatkeqësisht humbi jetën në zjarrin e tërbuar që përfshiu zonën e Lunxhërisë në Gjirokastër”, shkruan Rama.
Nga ana tjetër, reagimi opozitar është rizgjuar në formën e mënyrën e vet.
Kryetari demokrat Basha hodhi akuza duke pretenduar se helikopterët që duhen për shuarjen e zjarreve shërbejnë për udhëtimet e kryeminstrit. Ai ofroi një foto si ilustrim të asaj që thotë, por pa thënë se kujt kohe i përket pamja e Ramës në helikopter dhe motivin pse gjendet aty. 
“Mirënjohje për punonjësit e emergjencave civile dhe forcat e ushtrisë që po përballen me flakët përgjatë këtyre orëve të vështira.
Pamjet që i shfaqin teksa luftojnë me mjete rrethanore janë sa pikëlluese po aq sa indinjuese kur shohim se në të njëjtën ditë, Edi Rama, i heq përballjes me zjarrin helikopterin e ushtrisë, për ta përdorur për udhëtimet e tij.
Natyrisht, kërcënimi i zjarrit është i kudondodhur në rajon, por nuk ndodh askund që në një moment krize, mjetet e pakta të mpaken edhe më shumë për t’i shtuar privilegjet një individi.
Kjo nuk është papërgjegjshmëri, por modeli me të cilin është keqqeverisur dhe varfëruar vendi. Prandaj nuk ka fonde dhe mjete për t’u përballur me emergjencat, qofshin zjarre apo tërmete, sepse shteti përdoret si instrument i një pakice që punon për vete, jo për qytetarët”, shkruan Basha. /sarandacity.al/
