Në një reagim të tij pas seancës së parë të parlamentit të ri, kreu i mazhorancës Rama iu shmang në mënyrën e tij artikulimit të emrit të Berishës, të cilin, pak ditë më parë e quajti “dhëmballë e prishur” e PD-së.
I pyetur për të komentuar zhvillimet e fundit, atë të përjashtimit të Berishës nga Basha, prej grupit parlamentar, Rama dha këtë përgjigje: “Nuk është problemi im, nuk është halli i PS. Kush është e shkuara mbetet e shkuara”.
Për Ramën, për të personalisht e për opozitën, është momenti për një faqe të re.
“Ne vijmë në këtë Kuvend për mandatin tonë të tretë me dorën e shtrirë, pa marrë parasysh sesi do shkojnë zhvillimet brenda PD. Dora është e shtrirë, në funksion të vendit.
Jam shumë i përgatitur që të jem në lartësinë e fjalëve duke dhënë shembullin i pari dhe natyrisht duke u përmirësuar çdo ditë edhe në raport me ju. Jam shumë i vetëdijshëm që pa dashur mund të kem tejkaluar kufirin, kam krijuar shqetësime për ju.
Ju jap fjalën që unë të jem në dispozicionin tuaj, i urtë, i butë, i dashur”, iu drejtua ai gazetarëve. /sarandacity.al/
