Tre vite nga ngjarja e rëndë në fshatin Bularat, në Dropull, ku Kostandin Kacifas mbeti i vdekur nga një përballje me policinë prokuroria e Gjirokastrës ka vendosur të pushojë hetimet për këtë dosje, raporton Ora News.
Hetimet që nisën qysh prej datës 28 tetor 2018, fillimisht nga Prokuroria e Krimeve të Rënda dhe që më pas u vijuan nga Prokuroria e Gjirokastrës, tashmë konsiderohen të mbyllura. Kjo pasi prokurori i çështjes, Julian Çafka, ka proceduar me një kërkesë në Gjykatë, duke kërkuar pushimin e procedimit penal nr.824 të datës 24 dhjetor 2019.
Nga burime pranë Gjykatës së Gjirokastrës dhe Policisë së atyshme, mësohet se seanca për pushimin e hetimeve për dosjen e Kostandin Kacifas, është zhvilluar nga gjyqtarja Suela Dashi.
Të pranishëm në këtë proces kanë qenë dhe familjarët e viktimës, të cilët kanë kërkuar të njihen zyrtarisht me aktet hetimore që përmban dosja, njëherësh dhe me aktin e ekspertimit mjeko-ligjor të trupit të pajetë të të ndjerit dhe ekspertimin balistik të armës automatike, që ai me vete kishte ditën e ngjarjes.
Të dy këto akte hetimore, kanë dalë në përfundimin se Kostandin Kacifas, në datën 28 tetor 2018, ka kryer vetëvrasje me armën e tij, teksa ndodhej i rrethuar nga forcat policore RENEA, në malin mbi fshatin Bularat.
Për shkak se të afërmit e Kacifasit nuk janë njohur gjatë fazës së hetimit dhe fazës së gjykimit me hetimet e dosjes, mësohet se gjyqtarja e çështjes, Suela Dashi, ka urdhëruar Prokurorinë e Gjirokastrës që të tërheqë dosjen mbrapsht për t’i dorëzuar një kopje të akteve hetimore dhe palës së dëmtuar, që në këtë rast janë të afërmit e të ndjerit.
Këta të fundit, sipas legjislacionit shqiptar kanë të drejtë të njihen me aktet hetimore të dosjes dhe mbi bazën e tyre të japin oponencën dhe kundërshtimet që kanë në sallën e gjykimit.
Familjarët mund të kundërshtojnë ekspertizat që dalin në konkluzionin se Kostandin Kacifas ka kryer vetëvrasje, duke kërkuar riekspertim dhe përjashtimin e ekspertit të caktuar nga Prokuroria.
I vënë nën presionin e policisë dhe duke mos dashur të dorëzohet, pavarësisht thirrjeve të vazhdueshme me altoparlant nga negociatorët e RENEA-s, Kacifas në mesditën e 28 tetorit 2018 ka qëlluar veten duke kryer vetëvrasje.
Prokurorët argumentojnë se ai ka marrë dy plumba nga arma automatike kallashnikov që kishte me vete.
Sipas hetuesve, plumbi i dytë është kryer nga e njëjta armë dhe qitja është kryer shumë shpejt, ku mendohet se ka ndikuar forca e rëndesës së gishtit në këmbëzën e automatikut.
Në vendin e ngjarjes, nuk janë gjetur gëzhoja të qitura nga armët e forcave të policisë. Ndërsa shumë pranë trupit të Kacifas, është gjetur arma automatike dhe disa gëzhoja të qitura pikërisht nga kjo armë.
Familjarët e Kacifas, gjatë ceremonisë mortore dhe më pas gjatë ceremonive përkujtimore akuzuan shtetin shqiptar se e ka vrarë qëllimisht Konstandinin, por ekspertiza mjeko-ligjore tregon se pavarësisht agresivitetit ai nuk është qëlluar nga forcat speciale të policisë shqiptare, por ka vrarë veten në ditën kombëtare të “JO-së greke ndaj Italisë fashiste”. /tesheshi.com/
