Në truallin e mandarinave, në vend që të angazhohen pikërisht me mandarina, dy persona nga Saranda kanë zgjedhur kanabisin për kultivim, duke u ballafaquar më pas jo me fitimin e ëndërruar por me prangat e Policisë.
“Shërbimet e Komisariatit të Policisë Sarandë, në vijim të punës për parandalimin, evidentimin dhe goditjen e veprimtarisë kriminale në fushën e kultivimit të bimëve narkotike, në bazë të informacioneve të siguruara në rrugë operative, si rezultat i kontrollit të territorit, kanë evidentuar dhe goditur një rast të tentativës për kultivim të kanabisit në fshatin Xarrë, Konispol.
Në vijim të veprimeve, nga specialistët për Hetimin e Krimeve në Komisariatin e Policisë Sarandë u arrestua në flagrancë shtetasi S. M. (Sabri Muçaj), 24 vjeç si dhe u ndalua shtetasi A. A. (Alim Abazi), 60 vjeç, të dy banues në Sarandë.
Këta shtetas dyshohen se në bashkëpunim me njëri-tjetrin, kanë kultivuar fidanë të dyshuar cannabis sativa në një sipërfaqe të pyllëzuar në vendin e quajtur Qafa e Soronesë”, thuhet në njoftimin zyrtar të Policisë. /sarandacity.al/
