Policia Rrugore ngjan se është “hakmarr” për tragjedinë rrugore të një dite më parë në aksin Fier – Vlorë me shuarjen e një familjeje, duke zhdëpur në gjoba tejkaluesit e shpejtësisë, në këtë aks po e po, por dhe në të tjerë në të gjithë vendin.
Kështu, për 12 orë, në të gjithë vendin janë pezulluar 66 patenta e janë vënë 2668 gjoba.
Duke bërë një bilanc, Policia thotë:
“Gjatë ditës së sotme, në të gjitha akset rrugore nacionale dhe në zonat bregdetare, shërbimet e Policisë Rrugore, duke përdorur radarë, dragera, makina të pauniformuara, kamera e aparate fotografike, kanë konstatuar një numër të madh shkeljesh, konkretisht:
Janë pezulluar 39 leje drejtimi, për shpejtësi mbi normat e lejuara, matur me radar, dhe 27 leje drejtimi për drejtim mjeti nën efektin e alkoolit, janë marrë 473 masa administrative për përdorim të celularit gjatë drejtimit të mjetit, 397 masa për mospërdorim të rripit të sigurisë, 644 masa për shpejtësi mbi normat e lejuara, manovra të rrezikshme në rrugë dhe mosrregullim shpejtësie, veçanërisht në qendrat e banuara, 194 masa për mospërdorim të kaskës mbrojtëse në mjetet me dy rrota, 778 masa për parakalime të gabuara dhe 182 masa përmosruajtje të largësisë së sigurisë mes mjeteve”.
Sipas Policisë Rrugore, nuk është çështje frikësimi por edukimi.
“Të gjithë efektivët e Policisë Rrugore do jenë në detyrë për të përmbushur përgjegjësitë që i ngarkon ligji, si për rregullimin e trafikut aty ku është e nevojshme, ashtu dhe për të monitoruar sjelljen e të gjithë përdoruesve të rrugës në raport me normat e sjelljes, jo për të frikësuar, por për të edukuar dhe parandaluar ngjarje si ajo e djeshmja, që krahas përgjegjësisë është dramë familjare dhe sociale, e cila duhet të jetë reflektim për çdo drejtues mjeti dhe përdorues rruge, në respekt të ligjit dhe jetës”, thuhet në deklaratën e Policisë Rrugore. /sarandacity.al/
