Yuri Kim: Nga Tropoja në Sarandë, pse shqiptarëve u ka ardhur në majë të hundës…

Në një shkrim të ambasadores Yuri Kim, i pandodhur deri më sot nga paraardhës të saj, tentohet t’i vihet “gishti në plagë” problemeve më të thella shqiptare: korrupsionit dhe padrejtësisë në Drejtësi.

“Gjatë një viti e gjysmë të shkuar, kam pasur mundësinë të udhëtoj gjithandej në këtë vend të bukur dhe të takoj sa më shumë njerëz që mundem. Bajram Curri, Shkodra, Kukësi, Kruja, Tirana, Durrësi, Korça, Elbasani, Pogradeci, Berati, Gjirokastra, Himara, Saranda, Vlora – çdo qytet, qytezë e fshat – ka të veçantat e veta, por bashkohen në një pikë: iu ka ardhur në majë të hundës me metodat e vjetra; duan ndryshim të vërtetë; duan fundin e korrupsionit; duan një sistem drejtësie ku askush nuk është mbi ligjin; duan që kriminelët të qëndrojnë jashtë qeverisjes dhe politikës; duan një vend që i josh të rinjtë të qëndrojnë për shkak të mundësive; duan një vend që ecën përpara, jo prapa”, shkruan Yuri Kim, ku dhe njëherë potencon pozicionin amerikan karshi Shqipërisë:

“Për një kohë tepër të gjatë, korrupsioni është përdorur si armë nga aktorë shtetërorë dhe joshtetërorë për të blerë politikanë, për të fituar kontrata, dhe për të ndërhyrë në proceset demokratike.

Presidenti Biden dhe Sekretari Blinken e kanë bërë të qartë përmes fjalëve dhe veprimeve të tyre se lufta kundër korrupsionit është një përparësi kombëtare për Shtetet e Bashkuara. Duam një aleat që është i fortë, i aftë dhe i begatë.

Duam një partner, jo një problem”, shprehet gruaja që përfaqëson SHBA në Shqipëri, e që së fundi është gjendur në një breshëri sulmesh nga njerëz afër opozitës, pasi qartë kërkoi që Berisha, i shpallur “non grata”, të mos jetë më në parlament.

“Është koha që udhëheqësit të reflektojnë dhe të ndërmarrin veprime të guximshme. Është koha për udhëheqësit që të tregoni kush jeni dhe çfarë mendoni se meriton ky vend.

Është koha për të udhëhequr!”, shkruan ndër të tjera Kim. /sarandacity.al/